ИШТИРОКИ НАМОЯНДАИ ИНСТИТУТ ДАР ФОРУМИ ДУВУМИ ТЯНЬ-ШАН БАҲРИ ТАҲКИМИ ҲАМГИРОИИ ИҚТИСОДӢ ВА РУШДИ УСТУВОРИ МИНТАҚА
Санаи 2–3 ноябри соли 2026 дар шаҳри Алмаатои Ҷумҳурии Қазоқистон Форуми дувуми Тянь-Шань оид ба ҳамкории иқтисодӣ дар Осиёи Марказӣ баргузор мегардад. Дар кори форум аз Ҷумҳурии Тоҷикистон мудири шуъбаи бозори молиявӣ ва идоракунии лоиҳаҳои сармоягузории Институти иқтисодиёт ва демографияи АМИТ, доктори илмҳои иқтисодӣ, профессор Баҳром Шарифзода иштирок ва суханронӣ намуданд. Ин чорабинии муҳими минтақавӣ ба таҳкими робитаҳои иқтисодии байнидавлатӣ, густариши ҳамкориҳои сармоягузорӣ, рушди инфрасохтори муосир ва муайян намудани роҳҳои нави ҳамгироии иқтисодии кишварҳои Осиёи Марказӣ равона гардидааст. Ҳадафи асосии форум фароҳам овардани фазои мусоиди ҳамкории созанда миёни давлатҳо, ниҳодҳои молиявии байналмилалӣ, бонкҳои рушд, доираҳои соҳибкорӣ ва коршиносони соҳа ҷиҳати ҷалби сармоягузориҳои босифат ва татбиқи лоиҳаҳои муштараки иқтисодӣ мебошад. Дар меҳвари муҳокимаҳои форум масъалаҳои истифодаи самараноки сармояи давлатӣ ва хусусӣ барои бунёду навсозии инфрасохтори нақлиётӣ, логистикӣ ва рақамӣ, бартараф намудани монеаҳои тиҷоратӣ, содагардонии расмиёти гумрукӣ ва густариши ҳамкориҳои фаромарзӣ қарор мегиранд. Ҳамзамон, ба рушди энергетика, саноат, технологияҳои инноватсионӣ ва истифодаи имкониятҳои зеҳни сунъӣ ҳамчун омилҳои муҳими баланд бардоштани рақобатпазирии иқтисодиёти минтақа таваҷҷуҳи махсус зоҳир карда мешавад. Ҷанбаи дигари муҳими форумро масъалаҳои рушди устувори маҳаллӣ, ҳифзи захираҳои табиӣ ва таъмини амнияти экологӣ ташкил медиҳанд. Аз ҷумла, мубориза бо биёбоншавӣ, истифодаи технологияҳои муосири сарфакунандаи об, рушди кишоварзии устувор ва баланд бардоштани сатҳи зиндагии аҳолии деҳот аз ҷумлаи самтҳои муҳими баррасӣ ба шумор мераванд. Аҳаммияти баргузории чунин ҳамоиш дар шароити тағйирёбии равандҳои иқтисодии ҷаҳонӣ ва дигаргуншавии занҷираҳои байналмилалии таъминот беш аз пеш меафзояд. Осиёи Марказӣ бо дарназардошти мавқеи муҳими ҷуғрофӣ, захираҳои табиӣ, имкониятҳои транзитӣ ва неруи инсонӣ дорои зарфияти назарраси табдил ёфтан ба яке аз марказҳои муҳими ҳамкории иқтисодии минтақавӣ мебошад. Аз ин рӯ, ҳамоҳангсозии сиёсати иқтисодӣ, рушди долонҳои нақлиётиву логистикӣ ва татбиқи ташаббусҳои муштарак метавонанд ба таҳкими мавқеи кишварҳои минтақа дар иқтисоди ҷаҳонӣ мусоидат намоянд. Дар маҷмӯъ, Форуми дувуми Тянь-Шань на танҳо минбари табодули таҷриба ва баррасии масъалаҳои мубрами иқтисодӣ, балки имконияти муҳим барои ташаккули муносибатҳои нави шарикӣ, муайян намудани афзалиятҳои муштараки рушд ва тавсеаи ҳамкориҳои судманди минтақавӣ маҳсуб меёбад. Натиҷаҳои он метавонанд дар таҳкими ҳамгироии иқтисодии Осиёи Марказӣ, ҷалби сармоягузориҳои дарозмуддат ва гузоштани заминаҳои устувори рушди иқтисодиёти рақобатпазири минтақа нақши муассир гузоранд. Иштироки намояндаи илмии Тоҷикистон дар чунин ҳамоиши байналмилалӣ барои муаррифии зарфиятҳои илмӣ-таҳқиқотии кишвар, табодули таҷрибаи касбӣ ва густариши робитаҳои илмӣ ва иқтисодӣ бо ниҳодҳои минтақавӣ аҳаммияти муҳим дорад.
Муфассалтар
